Phili 4 | NdeIBE | STEP | Ngakho-ke, bazalwane bami, lina engilithandayo njalo ngilikhumbula, ntokozo yami lomqhele wami, kumele liqine kanjalo eNkosini, bangane abathandekayo!

Philippians 4

1 Ngakho-ke, bazalwane bami, lina engilithandayo njalo ngilikhumbula, ntokozo yami lomqhele wami, kumele liqine kanjalo eNkosini, bangane abathandekayo!

Ukukhuthaza

2 Ngiyamncenga uYuwodiya ngincenga loSintikhe ukuba bavumelane eNkosini. 3 Yebo, ngiyakucela, wena esidonsa jogwe linye ngokwethembeka, siza abesifazana laba abasebenza nzima lami ngenxa yesisusa sevangeli, kanye loKlementi labanye abasebenza lami, abamabizo abo akhona encwadini yokuphila.

4 Thokozani eNkosini kokuphela. Ngiyatsho futhi ngithi: Thokozani! 5 Akuthi ukubekeka kwenu kubonakale kubo bonke. INkosi iseduze.

6 Lingakhathazeki ngalutho, kodwa ezintweni zonke, ngokukhuleka langokuncenga, ngokubonga, bekani izicelo zenu kuNkulunkulu.

7 Ukuthula kukaNkulunkulu okudlula ukuqedisisa konke, kuzalinda izinhliziyo zenu lezingqondo zenu kuKhristu uJesu.

8 Okokucina, bazalwane, konke okuliqiniso, konke okulesithunzi, konke okulungileyo, konke okuhlambulukileyo, konke okuhle, konke okubukekayo – uma ulutho luluhle kakhulu loba lubongeka – cabangani ngezinto ezinje. 9 Loba kuyini elikufundileyo loba elikwamukeleleyo loba elikuzwileyo kuvela kimi, loba elikubonileyo kimi – kwenzeni. UNkulunkulu wokuthula uzakuba lani.

Ukubonga Izipho Zabo

10 Ngiyathokoza kakhulu eNkosini ngokuthi khathesi selize lavuselela ukungikhathalela kwenu. Impela kade likhathazeka, kodwa lingelalo ithuba lokukubonakalisa. 11 Kangitsho lokhu ngenxa yokuthi ngiyaswela, ngoba sengafunda ukwaneliseka loba kuyisimo bani.

12 Ngiyakwazi ukuba ukuswela kuyini, njalo ngiyakwazi ukuba kuyini ukuba lokunengi. Sengafunda imfihlo yokwaneliseka kuzo zonke izimo, langabe ngiyasutha loba ngilambile, loba ngilokunengi kumbe ngiswela.

13 Ngingazenza zonke izinto ngaye onginika amandla.

14 Kodwa kwakukuhle ukuba lihlanganyele lami ekuhluphekeni kwami. 15 Phezu kwalokho, lina maFiliphi, liyakwazi ukuba ezinsukwini elaqala ngazo ukwazi ivangeli, ekusukeni kwami eMakhedoniya, akukho lalinye ibandla elahlanganyela lami endabeni yokunika lokwamukela, ngaphandle kwenu kuphela;

16 ngoba lalapho ngise-Thesalonika, langithumela usizo njalonjalo lapho ngangingoswelayo.

17 Akusikuthi ngifuna isipho, kodwa ngifuna okuzakuba yinzuzo kini. 18 Sengamukele umvuzo ogcweleyo lodlulisileyo; ngiphiwe okwaneleyo, njengoba khathesi sengamukele ku-Ephafroditu izipho elazithumelayo. Zingumnikelo wephunga elimnandi, umhlatshelo owamukelekayo, othokozisa uNkulunkulu.

19 UNkulunkulu wami uzalinika konke elikuswelayo mayelana lenotho yakhe emangalisayo kuKhristu uJesu.

20 Udumo kalube kuNkulunkulu uBaba kuze kube laphakade. Ameni.

Ukuvalelisa

21 Bingelelani bonke abangcwele abakuKhristu. Abazalwane abalami bayalibingelela.

22 Abangcwele bonke bayalibingelela, ikakhulu labo abangabendlu kaKhesari.

23 Umusa weNkosi uJesu Khristu kawube lomoya wenu.